ترجمة بالعامية مع تصرف كثير لما ورد في حلقة ”truth torlls“ من بودكاست راديو لاب، والحلقة بالمناسبة تم حذفها بعد اذاعتها، لأسباب مختلفة منها ان فيه ناس اشتكوا انها بتؤيد تصرفات الترولز الي قاموا بالفعل دا.
الممثل شايا لابوف فكر في عمل عرض فني، الفكرة انه يبقى فيه بث حي يوم تنصيب الرئيس الجديد للولايات المتحدة (ترامب) ويستمر البث لأربع سنوات او نهاية حكم الرئيس (أي حدث فيهم يحدث أولا سينتهي معه البث الحي)، العرض الفني الي كان مفروض يتم بثه بيتكون من حائط وكاميرا للبث الحي وأي مجموعة من الناس (من ضمنهم الممثل طبعا) والمجموعة ستشترك في ترديد الجملة التالية: "مش هيفرقنا He will not divide us" واتعمل للعمل الفني دا موقع للبث الحي من خلاله تشاهده والموقع دا عنوانه، مكان تجمعهم كان بداية في متحف الصورة المتحركة في نيويورك.
واتجمع أمام الكاميرا أول مرة مجموعة بيقودهم شايا لاباف وبدأ يقول "مش هيفرقنا He will not divide us" وهما بيرددوا وراه الكلام. وما مرش وقت طويل وبدأ أنصار ترامب يعرفوا عن التجمع دا، فبدأ يضايقوا المجتمعين ويرددوا عبارات زي "هو احنا He is us"، وموقع 4chan عرف عن التجمع دا وأصبح هدف ليهم انهم يبوظوا عليهم التجمع دا بأي شكل.
وبدأو يضايقوهم بكل الأشكال المختلفة الي ممكن خيالك يفكر فيها، وأصبح هدف شبه يومي هو عكننة الناس المجتمعة في العرض الفني دا واخراجهم عن شعورهم وفعلا الممثل شايا لاباف خرج عن شعوره والامر اتطور واتقبض عليه بتهمة الاعتداء على آخرين، وبناءا عليه المتحف وقف العمل الفني وقالك ماليش دعوة، حلوا مشاكلكم دي بعيد.
فنقلوا التجمع والعرض دا لمكان تاني وبدأو يكرروا نفس الشيء، كاميرا مفتوحة وبث مباشر والناس بتردد نفس الجملة، وشايا لاباف وجه كلامه للناس الي بتتابع الحدث وقال لهم ما معناه انتم نجحتم توقفونا في نيويورك، لكن احنا نقلنا العرض لنيوميكسيكو، يا أغبيا يا نازيين وروني نفسكم ... الخ
وما فاتش كام ساعة والترولز استجابوا للتحدي وظهروا وبدأو يضايقوهم تاني، والبوليس جه، وووو العرض اتوقف لتاني مرة.
شايا قرر المرة دي يغير استراتيجيته وقالك خلاص البث هنعمله في مكان ماحدش يعرفه وبدل ما نتجمع ونقول الكلمتين دول، هنحط الكاميرا في وضعية بث حي على علم مكتوب عليه "مش هيفرقنا He will not divide us" ومش هنقول فين المكان دا، والمنظر الي ظاهر في البث الحي هو علم بيرفرف في السما، ومافيش أي علامة تدل على المكان دا.
الترولز تسكت؟! لا طبعا، بدأو يدورا على طريقة يعرفوا مكان البث فين.
على موقع 4chan بدأوا رحلة البحث لتحديد المكان، قالك فيه صوت ميه في البث، وفيه صوت ضفادع، بدأ زوار الموقع يبعتوا صور خرائط للأماكن الي بتعيش فيها أنواع معينة من الضفادع، خرائط للأنهار والبرك ... الخ
لحد ما واحد منهم بدأ يدور على مواقع التواصل الاجتماعي على أماكن مذكور فيها الممثل شايا لاباف، لحد ما عثروا على صورة حطتها جرسونة في مطعم في ولاية تينسي وبتقول فيها ان شايا لاباف فطر في المطعم النهاردا ... الخ، ودا كان بداية الخيط.
رجعوا تاني يتفرجوا على البث لحد ما عدت طيارة فوق العلم، ودا كان الدليل الثاني، لأن الطيارات لها مسار محدد ومواعيد اقلاعها ونزولها معروف ... وعن طريق المسار دا وتوقيت ظهورها في البث الحي ممكن يقربوا مكان العلم لمنطقة أصغر، وفعلا باستخدام مواقع تتبع الطائرات وجدول الرحلات قربوا مكان العلم لمنطقة معينة في الولاية، لكن المنطقة كبيرة والبحث فيها ممكن ياخذ وقت طويل جدا، كل دا حصل في نهار أول يوم للبحث عن مكان العلم، ولما الليل جه، السما ظهر فيها النجوم، فدا كان دليل تاني استخدموه عشان يقربوا المكان أكثر باستخدام مواقع النجوم في السما في الوقت دا، لسه برضه المساحة كبيرة، ففكروا في فكرة بسيطة جدا، يبعتوا ناس تمشي بالعربيات في دايرة حوالين المكان وتضرب زمارة العربية ويحاولوا يسمعوا صوت الزمارة في البث الحي، ولما بدأو يسمعوا الصوت يقولوا للسواق المعلومة دي، فيبدأ يحاول يقرب، لحد ما وصل لمكان العلم واداهم احداثياته.
ووصلوا فعلا لمكان العلم ونزلوا ورفعوا مكانه علم تاني.
فنقلوا العلم والعرض الفني لليفربول في انجلترا، وبرضه الترولز أفسدوا العرض في المكان الجديد.
ليست هناك تعليقات:
إرسال تعليق