والله هو الجبرتي راجل طيب. هه، راجل طيب. أنا بأقول عليه إنه هوا راجل طيب لأني أنا، أنا عرفته شخصيا! لأ مش عرفته يعني إني شفته! ماشفتوش! أنا ماشفتهوش أبداً. إنما أنا لما قريت كلامه عن محمد كريم، لقيته عمال بيهزق بيه تقريبا. وبيقوا إن إنه ... محمد كريم دا لما مسكوه الفرنساويين بعد ما اتضحت لهم خيانته، كدا بيقول! بعد ما اتضحت لهم خيانته، فهو يعني كان بيستعطف المسلمين ويقول للمسلمين: اشتروني يا مسلمين! اشتروني يا مسلمين.
فأنا في الحقيقة يعني أنا أنا استبعدت الكلام دا، ما اعتقدتش ما اعتقدتش في صحته.
ولما رجعت إلى المراجع الفرنساوية لقيت إن كبير تراجمة الجيش الفرنساوي وهو اسمه على ما أذكر اسمه ... اسمه ... ماجلون على على ما افتكر أو غيره، فا ... فا ... فتوسط ل لمحمد كريم وأراد إنه يخدمه بإنه يفرج عنه، يسعى في الإفراج عنه. فبعتله رسالة وقالو فيها: إنت راجل غني! إنت إيه يهمك؟ إنت راجل غني، ماتفدي نفسك بأي مبلغ يطلب منك دفعه. فهو رفض.
محمد كريم. رفض قطعيا. ده الي جاي من فرنسا! ماهيا حجج ، ليه؟ لأن دا أحق من كلام الجبرتي. ولذلك أنا ... أنا رجحت الكلام دا عن كلام الجبرتي.
وقلت كدا إن الجبرتي في الغالب كان راجل، فضلا عن إنه راجل طيب، إنه كان قابع في داره في الصنادقية، لإنه كان ساكن في الصنادقية في ذلك الحين. فأنا قلت الكلام دا يظهر إنه كلام مرجوح لأنه لأنه كلام الفرنساويين عنه عن محمد كريم أولى بالتصديق من كلام الجبرتي.
والله أنا كل ما أرجوه من الشباب إنه يدرس تاريخ مصر دراسة حقة. بحيث إنه ما يقعش في الظلمات الي وقع فيها غيره. فإذا أمكن للشباب المصري إنه يسلك هذا السبيل يعني يحكم على الأشخاص حكم حقيقي، أفتكر إنه البلاد تتقدم عن قبلا كتير أوي. ماهو مادمنا شايفين العالم العربي منقسم على بعضه بالشكل دا فأظن مافيش أمل في إنه يتقدم. وأنا من أنصار الوحدة مش الوحدة الي كانت بينا وبين سوريا، لأن الوحدة دي ماكانتش.
ليست هناك تعليقات:
إرسال تعليق