منجد - بقى يا دكتور عبده أنا بطبيعتي رجل مسالم و علشان كده يا عم أنا ضد الثورة بدمها و عنفها
عبده - انت ليه يا أخي الثورة عندك دايما معناها العنف و الدم؟ الثورة طريقة تفكير و عمل, زي ما الاصلاح بالقانون بتاعك طريقة تفكير و عمل, مش لازم يكون فيها دايما عنف و دم! مفهوم
منجد - انت عاوز الصراحة
عبده - آه طبعا
منجد - مش مفهوم
عبده - ههه, بسيطة أضرب لك مثل
منجد - أيوة, اضرب يا عم اضرب يا أخويا ..
عبده - لنفرض مثلا و لا بلاش نفرض. القانون و المحكمة الي انت فاكر دايما انك بيهم ممكن تصلح المجتمع
منجد - مالهم دول بقا كمان يا سي عبده
عبده - أقولك يا سيدي أقولك
منجد - قول يا خويا, اتفضل قول
عبده - انت طبعا عارف ان فيه قانون بتطبقه المحاكم بيعاقب بالحبس كل إنسان يمد ايده في الشارع و يشحت
منجد - طب و ماله؟ البلد على الأقل تنضف من الشحاتين. انت يعني عاجبك منظرهم كده لما بيتلموا على الواحد في السكة زي الدبان
عبده - طيب و مين الي أوجد الشحاتين؟
منجد - حيكون مين يعني؟ كسلهم! يشتغلوا يا أخي! لقمة العيش عمرها ما كانت بالساهل
عبده - و هوا فين الشغل؟
منجد - فين الشغل؟!
عبده - آه
منجد - يدوروا عليه! يشقوا يلاقوا
عبده - فين؟ فين؟
منجد - فين؟! في كل حتة! إلا فين دي كمان
عبده - مافيش مافيش
منجد - مافيش ازاي؟! البني آدم يلاقي ألف طريقة و طريقة لكسب العيش من غير مدة كفه
عبده - الحقيقة فيه تلات طرق بس لأكل العيش: الشغل و الشحاتة و السرقة. و السرقة القانون بيعاقب عليها أكتر من الشحاتة, يعمل ايه بقى البني آدم الي ما عندوش شغل
منجد - يعمل ايه؟!
عبده - آه
منجد - إلا يعمل ايه دي كمان, هو حر يا أخي يشحت يسرق ذنبه على جنبه القانون يربيه و المحكمة تحبسه و تعلمه فلما يخرج يبقى عارف الصح و الغلط و هوا و خلاصه بعد كده
عبده - هيخرج برضه مش هيلاقي قدامه غير طريقين اتنين الشحاتة و السرقة
منجد - سبحان الله يا أخي, انت ليه بتقفلها بالشكل ده
عبده - لأنها مقفلة فعلا يا أستاذ منجي مافيش شغل مافيش شغل
منجد - أومال يعني عاوز ايه؟ عاوز القانون يسيب الحرامي, كلام ايه ده الي بتقوله برضه يا سي عبده
عبده - لا أنا عاوز القانون يعاقب صحيح الي يسرق لكن يوفر الشغل أولا لكل واحد
منجد - الشغل لكل واحد!
عبده - أيوه
منجد - لكل واحد! و المعجزة دي تيجي منين بقى؟
عبده - تيجي من تغيير المجتمع نفسه
منجد - تغييره!
عبده - آه بدل عرق الناس ما يتحول لفلوس تتدفن في البنوك يتبني بيها مصانع مثلا بدل ما كل شيء يتكوم في حجر كام واحد بس المجتمع ياخد و يمد ايده بالعمل و لقمة العيش لكل واحد المجتمع لازم يفتح أبواب الدنيا للكل مش يفتحها لناس مخصوصة و يقفلها ضلمة في وش بقية الناس
منجد - كلام ايه الي بتقوله ده يا عبده؟ انت في وعيك يا ابني؟
عبده - ههه يا أستاذ منجد افهمني افهمني طول ما الفقر موجود و احنا مصهينين عليه طول ما الميكروب ده في بلدنا هيولد بدل الشحات عشرة و بدل الحرامي مية لا إحسان ينفع و لا تربية تفيد يبقى المحكمة والقانون يقدروا يعملوا ايه؟
منجد - يقدروا يعملوا ايه! هوا احنا بنقرا في عبس يا أخي من الصبح؟ يربوا! يصلحوا!
عبده - يربوا ايه و يصلحوا مين
منجد - هيرجع برضه تاني يقول لي يصلحوا مين؟ يصلحوا أخلاق الشحات! أخلاق الحرامي!
عبده - الي يصلح أخلاق الحرامي انه ما يبقاش حرامي
منجد - مظبوط
عبده - و عشان ما يبقاش حرامي لازم يعيش شريف و عشان يعيش شريف لازم يشتغل و عشان يشتغل لازم يبقى الشغل موجود و عشان يبقى الشغل موجود لازم المجتمع يخلقه و عشان المجتمع يخلقه لازم يتغير وضعه هي دي القضية يا أستاذ
منجد - القضية؟! دي فزورة! بتجيبوه منين؟ بتزرعوه ازاي؟
عبده - هوا ايه الي بنجيبه و نزرعه يا أستاذ منجد؟
منجد - الكلام و الأفكار و الخيالات بتاعتكم دي. اسمع انته لسه شباب دمك فاير يا عبده بكره الزمن يصحيك من أحلامك و يعلمك الدنيا ماشية ازاي من أيام سيدنا نوح و قبل سيدنا نوح كمان سيبك سيبك من الأفكار والخيالات بتاعتك دي
ليست هناك تعليقات:
إرسال تعليق