الأب - تؤ تؤ تؤ تؤ ... للدرجة دي انت مجرم بتضرب الناس بالرصاص؟
الضابط ملاك - بابا!!
الأب - خليك مطرحك! يا تافه يا طويل يا أهبل.
الضابط ملاك - وليه بس يابابا؟
الأب - كنت بأعلمك وأكبرك عشان تبهدل الناس يا ملاك؟
الضابط ملاك - بابا ... أنا!
الأب - اخرس! لا انت ابني ولا أعرفك. كنت ابني لما كان حلمك هو حلمي، لما كنت بتسألني وانت في حضني امتى هتكبر عشان تخلي كل واحد في بلدك يلاقي لقمته وسكنه؟ لما كنت بتقول ان نفسك تبقى كبير عشان تنتقم لبلدك من الي بيذلوها مرة بالحرب ومرة بالدولار.
الضابط ملاك - حد يقدر ع الدولار يابابا؟
الأب - اتفو عليك وع الدولار وع اليوم الي خلفتك فيه!
الضابط ملاك - يابابا افهمني.. الظروف الدولية.. ثم مش أنا الي وحدي الي مسئول! انت كمان! وماما! ثم مين قالكوا ان أنا عاوز اشتغل الشغلانة دا هه؟! انت الي كنت عايزني اشتغلها م الأول، عشان تتباهى قصاد اصحابك الي بتقعد معاهم ع القهوة، ابني لبس البدلة الميري! ابني لبس البدلة الميري! وماما كمان! كانت عايزة تتعتق من طابور الجمعية! البدلة الميري! اديني لبستها!!
